حكايات وعلوم

دنياك يا الصاحب حكايات وعلوم
قصص عجيبة تذهل اللي قراها
دنياك لو تضحك معك دايم الدوم
خلك فطين ولا يهمك رضاها
كم واحدٍ تبني له آمال وحلوم
يفنى وغيره يهتني في بناها
يا ما أفرحت قومٍ ويا ما أحزنت قوم
وكم أعشقت عينٍ وخانت غلاها
يا صاحبي شفت أمس .. شف حالنا اليوم
دنيا تقلّب يكفي الله بلاها
اليوم لا منّه بغت عيني النوم
تنكدت روحي وعافت كراها
ما كل من علاّ بالأصوات مفهوم
وما كل روحٍ تلتقي في مناها
وما كل من يشكي معذب ومحروم
وما كل من يضحك همومه نساها
بحر الحياة إن صرت ما تعرف العوم
يرميك في غبة بعيدٍ مداها
من راح يستسلم من أحزان وهموم
يموت حي وحاجته ما قضاها
واجه هبوب الوقت بإيمان وعزوم
لا بد ما ربك يهدّي هواها
واصبر إذا شمسك حجب نورها غيوم
الغيم يتفرق ويشرق سناها

هذه القصيدة اخترتها لكم للشاعر سعد الخريجي ارجو ان تعجبكم

ابيات جميلة ومعبرة
تشكر تميم لذائقتك العذبة
دمت كماتحب

صح لسان الشاعر 'وسلم بنان الناقل
شكرا تميم
ودمت بخير
..

واصبر إذا شمسك حجب نورها غيوم*
الغيم يتفرق ويشرق سناها
...
مافي أحلا وأجمل من الأمل والتفاؤل مهما قست الظروف
شكرا تميم ويعطيك ألف عافية

قطفك رائع وذوقك مميز يا تميم..[emoji257]