الإحتواء

(الاحتواء) 🌹

نقعد مع ناس سواء أقارب أو صديقات أوحتى عابرين ونسمع شكواهم المختلفه..
مثل أعراض صحيه أو مشاكل عائليه وغيرها.

ويختلف التفاعل حسب كمية الوعي وكمثال :

وحده تقول سكنت بيت جديد وحسيت بضيق وإني كارهته

الردود ممكن تكون..

لاتكون صابتكم .... !!
لايكون مرض مؤذي !!
لايصير البيت فيه بلا قبل تاخذونه!!

لكن نااادرا ماتلقين وحده ترد وتقول إنه شعور طبيعي تحسين به لمجرد الانتقال لبيت جديد وأنها فتره وبتعدي..

بعض الناس يتأثرون بسرعة..
كلمه منك تقلب حياتها وكيانها ومتاهة مثل العين تخليها تحوس على الرقاة وتتعب أكثر

لكن الكلمه الحلوه وإذا هونتيها عليها بتخليها ترتاح وممكن بنفس اللحظه تتحسن وتترك هالتفكير السيء.

البعض عندهم قدرة عجيبه على تعكير مزاجك وتوقع الأسوأ ومجلسهم كله قصص عن الخيانات الزوجيه والشعوذة والخادمات المجرمات
وأعراض الأمراض والجرائم وحوادث السطو والخذلان.

نصيحه إذا شكى لك شخص من هم وعجزت تخفف عنه فلاتزيد همه
اسكت أفضل حتى لو نيتك زينه ودوافعك حرص ومحبه.

قبل 6 سنوات شفت وحده مره نحييييفه ويوم سلمت عليها قلت لها يقالي ظريفه وأنا اضحك يختي وراك مختفيه البنت تغيرت ملامحها وطول الجلسه كانت متململه.

يوم رجعت البيت راجعت نفسي وكلمتها واعتذرت منها وقالت إني أعاني من نحافه مرضيه وفقدان شهيه حاد.

وأنا كانت نيتي زينه وتعليقي كنت متوقعه إنها متعمده تنحف بهالشكل

وكان هالموقف دررررس لي لو دخلت الف دورة تطوير ذات ماتعلمت منها
وعرفت انه من سوء الأدب نقول لأحد وراك ناحف او سامن الا اذا كان التعليق جميل مثل ناحف ومحلو او سامنه وجسمك حلو.

هالمشهد يتكرر مع امهات عندهم اطفال نحاف وراه ولدك نحيف وراه بنتك عصلا وراه لونهم اصفر وراهم شاحبين
تقولينه مجتهده لكنك تنكدين عليها.

الشواهد كثيره ماودي اطول اكثر
ليكن حظ المؤمن منك ثلاثة ؛
إن لم تنفعه فلا تضره.
وإن لم تفرحه فلا تغمه.
وإن لم تمدحه فلا تذمه.

ربنااا لا تجعلنا سبب في ضيقِ أحدٍ من إخواننا المسلمين

بالطبع كثير مانسمع بهذا الكلام
والبعض يقولونه أمام المتواجدين بالمجلس وتبدأ تعليقات هي كانت السبب
سلمتي عزيزتي على هذا الطرح المفيد
وفقك المولى ورعااك
دمتي بخير