ردية بيني وبين إبني خالد

بسم الله الرحمن خلاق الاكوان
المعطي المغدق بيسره وخيره

يالمعتلي نرجوك رحمة وغفران
واكبر منانا في الحياة الستيره

سلام للي قد جعل مني انسان
اللي مكانه مايعوضه غيره

لا من تكلم نخضع ونصغي اذان
رهن الاشاره في الامور العسيره

خمسه ولا فينا خبيثاً وخوان
على خطى الوالد نشد المسيره

ارخص لنا الغالي وماحسب اثمان
ياكم سقانا من كرمه وغديره

شال الحمل عنا وخلا لنا شان
ماشوف مثله وسط شبه الجزيره

ودي اموت ولا ارى ابوي زعلان
رضاه اغلى من الكنوز الوفيره

علمتنا نقضي العمر ود واحسان
نفدا رجولك يانقي السريره

والله مانوفيك حقك ولو كان
مهما فعلنا مانعادل وتيره

عشنا تحت ظلك وفي امن وامان
ياصاحب الحكمة وجبر الكسيره

بقلم/ خالد سعد
===========
الـــــــرد

يامرحبا واهلا هلا ياكحيلان
ترحيب ينشر لك على كل ديره

خالد لباس الجنب للمجد عنوان
يمناه ساطي والفعايل كبيره

جتني القصيدة بالقوافي والاوزان
أبيات جزله والمعاني غزيره

ابيات جلّت كل همي والاحزان
احلى من الكادي ونفحت عبيره

قريتها وابشّرك وضعنا زان
وإرتاح بالي من لهايب سعيره

عساك تبقى لي على طول الازمان
وتبقى ذخر يوم السنين المريره

لاهنت ياالضرغام والقاف لا هان
ياصانع المجد التليد وخشيره

واخوانك الغالين واطوال الايمان
هم درعنا الضافي نهار المغيره

تلقـى مواقفهـم ليـا ثار دخـان
وتلقى بهم يابوك شيمه وغيره

وانته عريب الساس ياصقر شيهان
يامسندي يامحزمي والذخيره

صحيح لو نكتب من القاف ديوان
تبقى القوافي في مدوحك فقيره

يالله انا طالبك ياعالي الشان
إنك من اهموم الليالي تجيره

ابو خالد

ماشاء الله تبارك الله
ع قولة المثل
ابن الوز عوام

صح لسانك وابنك
ابيات جميلة بل حد الروعة

امسك 🌹

ماشاء الله الاب والابن شعراء
والله الابيات جزلة وقوية جدا
وتفوق كبير في كتابة الشعر
جميل ان تكون لغة الشعر لغة تفاهم وتناغم
بارك الله لك في خالد وبارك الله فيك

صح منطوقكم يابوخالد
الله يبارك فيه مانسى والده ونعم الابن
بدع ورد ممتع وفيه وصوف تقال وتذكر
بوركت يابوخالد ع ما اتحفتنا به ولاعدمناك ياغالي

اخي الغالي/ الصامت

صح الله بدنك والأجمل مرورك
وتواجدك في متصفحي
حفظك الله واسعدك
وكل الشكر لسموك

الأخت/ عروبة وطن

ياهلا وغلا تجمّل متصفحي بوجودك
وجمال تعليقك
بارك الله فيك وحفظك ومن تحبين
وشاكر لك ومقدر

اخي الغالي/ تميـم

تشرفت بمرورك ووجودك في متصفحي
وصح الله بدنك وجمل الله حالك
وبارك الله فيك وجعلني ما اعدمك
ودي وشكري

ماشاء الله تبارك الرحمن ربي يحميكم
ابيات قمه في الروعة والجمال
ربي يحفظكم وصحت ألسنتكم واعتلا شانكم
ابدعتوو
دمتم بخير يارب

ماشاءالله تبارك الله
من أجمل المحاورات
بوح جميل، ونبض صادق
سلم البنان، ودام عزف الوجدان والفكر
لاهنتم شعارؤنا ع رقي الجزاله والنبض الجميل
دمتم وطبتم
....
.

ام هتان

اشكرك من كل قلبي لحضورك المميز
وكلماتك الجميلة
صح الله بدنك وحفظك
ودمتي كما تحبي

السفيره

اسعدنى كثيراً مرورك وتعطيرك هذه الصفحة
وردك المفعم بالجمال
حفظك الله ومن تحبين
وشاكر لك ومقدر
ودمت وسلمت