الفراعنة يتوجه الى شيوخ قطر بـ معلقة للعفو عن ابن الذيب

بسم الله الرحمن الرحيم

توجه الشاعر ناصر الفراعنة بمعلقة ثامنة جديدة تناهز المائة بيت ينخى فيها ولي عهد دولة قطر الشيخ تميم بن حمد آل ثاني ويطلب منه العفو والإفراج عن الشاعر محمد بن الذيب

والقصيدة متعددة الأغراض وفيها من كل بحر قطرة

تناول فيها جميع أغراض الشعر تقريباً من الوقوف على الأطلال والزهد وذم الدنيا ووصف الابل والفخر والمدح والحكمة والأمثال والفلسفة التأملية
القصيدة تحتاج لقراءة متمعنة متأنية واستماع متكرر
وصح لسانك يابو فارس وبيض الله وجهك على هذه الوقفة المشهودة

لتحميل القصيدة الصوتية بصيغة mp3

ما لللمنازل أمست بغتةً جردٍ مجاديب=ما كن مرت عليها من غيوم الوسم غيمه

كأنها لم تكن لمتيهة شقح الحنازيب=مربى ولا صُبّ فنجالٌ ولا حطت وليمة

صفر بلاقع وكانت مدة خضر رباريب=ما عدت منها أرى إلا ثلاثاً في هشيمة

صلى بها الدهر شرقاً واْبْذرت فيها السراعيب=صوارم الدهر بعد الدهر خلتها صريمه

اليوم بأسفل شجرها ما تشوف الا الحطاطيب = حزناً عليها صليب البوم يجذبني رنيمه
هل أورث الدهرُ منها ساكناً إلا الأكاذيب=يوماً وهل ثَمَّ ما يغني نديم عن نديمه

يا حالب الدهر عن شطرين هل إلا الألاعيب=كانت مواعيدهُ أم فك من غرمٍ غريمه

من قارع الدهر صنويهِ رأى منه الأعاجيب=شتى ولم ينجِهِ منهُ حجابٌ أو تميمة

وما الغرابةُ في تكديرهِ صفو المشاريب=فالغدر في طبعهِ كاللؤم في النفس اللئيمة

كم سحّبت كفّ بقعا من عزيزٍ بالتلابيب=كم بطّرت من ذليلٍ نجسٍ فعوله ذميمه

دنيا دنية تجندل كل ذي صوب وذي صيب = مهما ظهر من جمال اوصافها تبقى دميمه

قفّت بقاسم وقفت بالثنين عضيب وضبيب = وانا اشهد ان السلامة من دغايلها غنيمه

مِن نازل الغاب من ليث ومن نمر ومن ذيب=يا نازل البر هل أبقت لذي عزم عزيمة ؟

واصاحبي دونه القضبان محكمة اللواليب = حارق جحيمه تعشى قاصداً بارد نعيمه

واصاحبي دون شوفه تسرح العقبان وتجيب = دونه حدتني ظروف سود واوضاع اليمه

ذيب قنب في ذرى الشم الطوال وجاوبه ذيب = ما ندّرق عنه لو صارت خسايرنا جسيمه

جندلت من كافر الافكار ما جندل جليبب=وسط الضلوع المحاني تسعهن راحن صريمه

اغيب وافيق كل شْوي شِوي وافيق واغيب=عام وحالي على ذا الحال لاحقها هضيمة

هندب وهندبت له من ضيقة الخاطر هناديب = تسعين واللي ورا التسعين تاكله البريمه

ابوك هَمٍّ ورا عوج الضليعات المحاديب = بأذني ليا هب ذعداع الجنوب اسمع وشيمه

من دم جوفي سيوفه حدر سرجوفي مخاضيب = مرعد قنوفه سنه واكثر وهو يرزم رزيمه

يا ليت شعري أنبعٌ ماءهُ يجري ثغابيب=أم دمع عين تهامت منه فوق الخد ديمة

أمر قرعت لهُ عن شدّةٍ حمر الظنابيب=حتى عسفته بحدّ مصقلٍ كنه ضريمه

لو ما الشجاعه بلا عقل بعيبٍ يا تريحيب = ما كان شفت الشجاع الاحمق يسمّي صتيمه

كم من معذرب رياجيل وهو كله عذاريب = يعاير الناس بــ شْيمْها وهو مافيه شيمة

هيسٍ سنونه على شذب القفا مثل الكلاليب = هايم فؤاد ونفسه من تخبطها مهيمة

الرابح اللي يجنّب عن شرار الخلق تجنيب = بيته على منهج الاسلاف أساساته قويمة

عن ناقلين الفتن تلقاه في روس المراقيب = يرعى حلاله وعينه عن عيوب الناس نيمة

وان شاف دنياه تشعب له بعير الشامي هْديب = قال اتركيني وشأني واذهبي وانتي مليمة

معرّب مايجيه مدوّر الحاجات ويخيب = هذاك والله جعل ربي يزيده من نعيمه

خير المعازيب من باشر ضيوفه بالتراحيب = تبسّمك في وَجه ضيفك يساوي له عزيمة

صيّور بيض الليالي تنقلب دهمٍ غياهيب = حظ المناعير منها يالشماتة يالشتيمة

تجمع لنا شمل اجانيب وتفرق شمل أصاحيب = على العجايب فطمها الله ألا بئس الفطيمة

كم من فتى بالذي يرجو تدحلب له دحاليب = ثم عرّضت قلّته لأسياف الأقدار الصليمة

نسوق ما سيق والباقي على من يعلم الغيب = سبحانه من عينهُ عن كل ما أخفي عليمة

نعوذ بالله من سوءة منفّخة اللغابيب = ومن مكر من لا أقاموا من صراطٍ مستقيمه

اعناقهم من تفاهة فكرهم مثل الأنابيب = واسلابهم من قذارة مكرهم ما هي سليمه

من بعد ذا يا مناديب السعد نعم المناديب = تفيّعوا كل وجنا ضامرٍ هَيما هميمه

يا صلب جدي خذوا مني غداً معكم مكاتيب =تكفون تكفون همي واصلٍ ذاليوم تيمه

من شرق وادي الغضا يا اهل النضا شيب المحاقيب=ردوا سلامي على اهل المواجيب العظيمة

سود غرابيب تزمي دونها سود غرابيب = كأنهن من حراير بيت حاميٍّ حريمه

فلح المشافر عثافر ما دخل فيهن شواذيب=من صلب ريمان الأول حوّلن من بطن ريمه

بين العروق السبيعية وما بين الدباديب = كن سابقتهن صهارة واسطٍ في راس خيمة

كن ليل عشرين فوق ظهورها ينشر جلابيب=كن داب موسى حزام البطن يوم اكرب خديمه

ان قزّلن كنهن من شقح ساموده يعابيب=وان عزّلن كنهن ربدٍ تعزب عن ظليمه

وان شرّقن كنهن شهلول نوٍ مع مزاريب=وان غرّبن كنهن ديمٍ تلاشى منه غيمه

اليا اقبلن كنهن ممشى لواري مع سراديب = واليا ادبرن كنهن ممشى غذاءٍ مع مشيمه

حمر مذانب محاجرهن مثل حمر المشاهيب = هوج هجاجٍ هجاهجج حراجيج مسيمه

وان دفلجن كنهن من جورهن صفر اليعاسيب= وان قصّرن جند زنجٍ سار في حضرة زعيمه

شيب المحاقب لها بين الوبر مثل المحانيب=جرايرٍ كنها جرة حيايا في خريمه

نسع الغوارب كبار الروس عجلات المهاذيب =من ديرة اخوان شما حدورها اخوان شيمة

اسبق من اللي حموا في ظهورها حرش العراقيب = وادلّ من جانحات الطير في الغدرا العتيمه

منصاكم ابلج هل العليا تميم منقع الطيب=أكرم بهٍ من فتى سرا المعالي في صميمه

تعزّبوا خيرُ من كانوا لخاطرهم معازيب=حكام دولة قطر اهل المواقيف اليتيمه

يا ابو حمد يا شباب اللي لعب في وجهه الشيب = بسمك نجاوب ضحىً حلوات الاصوات الرخيمه

يا عزنا كل ما دارت علينا من عوج بقعا دواليب = يا درعنا كل ما شفنا من الدنيا ظليمة

يا الماطر الغيم يا ذروة هل الصفر الهلاجيب=يا جالي يالضيم يا قاطع ظما كبد مضيمه

يا نافل الطيب يا وجه الشبب يا ماحي العيب = انخاك بمحمد ابن الذيب الذيب والنيه سليمه

ابوك راعي العمانية حمد لا جيب ما جيب = وامك عقيلة كرامٍ من مناسيبٍ كريمه

انخاك بسم القبايل من مراكش لا سَرنديب = تطلق سراحه قبل لا يندف الوسمي نسيمه

يا نور عين عمت يصحيب من لا عنده صحيب = يا سقم من نازعك يا طب الاكباد السقيمه

تميم سيد تميم كلها عند الاجانيب = هيف الهرافا ونجم القيظ وضّاح سديمه

أكرم بهِ والسبايا من مشاوشها جناديب=أكرم بهِ والمطايا من مناوشها حطيمه

أكرم بهٍ والمراجل دونها طق المشاعيب= للناس من دون جر حبالها زوم وزيمه

صفوة صناديد عليا متعبين الفطّر الشيب=مزبنة من نخاها لو عليه مْية جريمة

المطعمون سيوف الهند أدماء الصناعيب=الملحقون بمن أزرى بهم شر الهزيمة

المودعون غصون الزان أمثال الدعابيب=النازلون المخاوف لو عواقبها وخيمة

فكاكة المنتحي لا فرّعنْ بيض الرعابيب =في غبّ يومٍ على الغافل مثل يوم الرضيمة

يوم عجاجه كسى روس الطويلات الشناخيب = كونٍ فحاحيل فرسانه من الروعه عقيمه

اهل الدروع اليمانية مطوّعة الاصاعيب = اهل الصدور الشماليه والامجاد القديمة

منقّذة ما لبق في ضفهم من شمّخ النيب= منفّذة ما يشوفونه من الاريا الحكيمة

كفوفهم من جزالة مدهم مثل المغاريب = وجيههم من نقاء نفوسهم دايم وسيمة

أولاد حامي الثفر لا زعزعوا عوص المصاليب = واستفرست مع فوارسها معالكة الشكيمة

مدحي لهم في العرب ما قلته الا عن تجاريب = اعد ما شفت إن الحر لا يبخس خصيمه

وانا ولد خاتم الشارات نزال المحاريب = جعل الحيا من عقب طول النيا يسقي رميمه

أنأى بإسلوب فكري عن وضيعات الأساليب = ابوي قسّام ما فوق الثرى وانا قسيمه

صفوة بني عامر الغُرّ الرجالات العباعيب = أهل القباب الحمر واهل البطولات المقيمه

ذروة هوازن خلاصة قيس ما ناقف على العيب = نكرم وتكرم تميم وكبد شانينا محيمه

فــ (نحنُ) في مٌضَرِ الحمراء لا شكٍ ولا ريب=إخوانهم وبهذا أنبأت عنا حليمة

بحق ما قد ضى لك معك يا حْصان الاطاليب=بحقّ ما لكَ بين الناس من قدرٍ وقيمه

في واجب محمد بن الذيب يا راعي المواجيب=حشمة لحانا بعفوك عنه يا راعي الحشيمه

يا شوق من لا تلفّت للعرب تبغى الخطاطيب = كُنْ مثلَ أحنفَ ذو حلم وذو نفسٍ رحيمه

ما في العرب واحدٍ ما هوب يخطي يا ابيض الجيب=كم قوّمَ الحلم فينا من عَوَج نفسٍ غشيمة

الناس من عصر ابو زيد وعصر ذياب وكليب=ما احدٍ سلم من خطا نفسه لو فْعوله عديمه

ما زالوا الناس فيهم مخطيٍ يا شيخ ومْصيب=يا كم ذيبٍ يخاتلهم بجلدٍ من بهيمه

اهل الحكي في ينابيع الصفا منهم حثاريب = ومثلك يطير السعد ما يلتفت لأهل النميمة

هذا وصلوا على أزكى بني آدم مناسيب = ما رف جفن وما قامت على البيدا مقيمه

وعداد ما ناحت الورقا على خضر النبانيب = شدواً وما سائل الطرقي حميمُ عن حميمه

صـــــــــــــــــــح لسآآنك يَ نآآصر

واللـــــــــه قصيـــــــــــــده ولآ أرؤؤؤع

من أجمــــــــــــــــــــــل مآآ سمعت

مآشآء الله

لآ قوةة إلا بالله

شــــــــــــآآعر ولا كل الشعرآء

أبو فــــــــــــــــوآز

سلمت الإيآآدي ع النقل

وسلمت الذآئقه الرآآقيه

لا ع‘ـــــــــــدمنآك يَ ملك .

موقف شجاع ونبيل من الشاعر ناصر الفراعنه

يشــــكر عليــــه

وقصيده رائعه جدا

شكرا ابو فواز ع الموضوع

الرائع

سلمت أناملك

ود ي وتقديري لسموك

كل التحايا