أنت خمسه سبعتين وذاك سبعه خمستيـن !!

أنت خمسه سبعتين وذاك سبعه خمستيـن !!

دق جوالي وأحـس القلـب يومـه دق .. دق

صفر خمسه أربعه .. وآخـره خمسـه سبعتيـن !!

قلت.. في بالي وش الطاري عسى المحبـوب رق ؟

من ثمان شهور مايسأل عسى الطـاري حنيـن !

المهـم إني ذكـرت الله .. وقلـت الله حــق

وأضغط الزر المحدد .. سم .. عفوآ أنت مين ؟؟

قلتها وأنـا أعرفـه ميـر الثقـل حـل وسبْـق

قال أنا اللـي متصـل وأرجـوك زيّنهـآ تزيـن !

قلت : ( يعني ) قال : يعني شوفني ميـت زهق !

ودي أسولف معك من غير جيـم وغيـر سين ؟

قلت.. تآمر قـال تسلـم وأبتـدأ كشـف الـورْق ؟!

وأسمعه دق ( السبيكر ) قلت.. عونك يآمعين !

قال.. وش حآلك عساك بخير .. قلت الخيـر طـق

من عقب فرقاك ياقاسي غدآ حالي حزين

قال قلبك وش علومه .. قلت قلبي أحترُق

مآ قـوا هجرك ولا بعدك ولا قهـر السنين !

قال.. شعرك .. قلت شعري .. لا أبد طـب و تنْـق

كل خفّاقي قصآيد .. مـن يسـار ومـن يميـن !

قال.. كبه .. قلت .. أكبه .. قـال.. والمركـب غـرْق

قلت.. مركب إيش هذآ .. قـال .. طحـت بِ هالكمين !

ماني بصاحبك بس أرجـوك مـن يسبـق لبْـق

أنت أسلوبك عسل وأنفـاس حكيك يآسمين ..

بالغلط دقيـت .. وأحمـد ربـي الـرازق رزْق

والله أعلم إنك مشبـه على شخـص ثميـن ..

قلت.. لحظه ماهي الدعوه صحن خبـز ومـرْق !!!

أصبر أصبر خلني أعرف مكـان اللبـس وين ؟

قمت أراجـع رقمـك الموجـود وأشوفـه فـرْق

أنت خمسه سبعتين وذاك سبعه خمستيـن !!