مدونة أبو مسلم (قصص وقصائد ونوادر وفوائد)

((((أتعب على اللي صحبته ترفع الراس)))

كان الذكا .. في منهجك تخدع الناس
يومـك تفاخـر بالخـداع وتباهـا

الله يقطـع صحبـةٍ مالهـا سـاس
صحبة مصالح لأجل حاجـه بناهـا

كيف المبادي يا أهل العرف تنـداس
صارت توجهـا المصالـح وراهـا

ماعاد للصحبـه مشاريـه وقيـاس
عند الـذي هانـت عليـه ونساهـا

كرهت صحبتهم مثل دم الأضـراس
وعلاقتـي معهـم نـزل مستواهـا

في حالهم صاروا مثل طابخ الفـاس
اللي تظاهر بالذكـا .. مـن غباهـا

افكارهـم عنـد المهمـات تحتـاس
مـع قلـة الافعـال كثـرة حكاهـا

اتعب على اللي صحبته ترفع الراس
دنيا ودين .. وعز نفسـه رضاهـا

يذهلك الالبـاب يحبـس الانفـاس
نفسه رفعها ماخضـع فـي هواهـا

ترى المواقف فالمواجيـب نومـاس
مواقـفٍ يفـرح بهـا مـن لقاهـا

انا بليـت بقلـب طيـب وحسـاس
في وقت طيب اقلوبنا هـي عناهـا

بعض البشر لامن غلط قلت لابـاس
يشفع لهـا عنـد الخطايـا غلاهـا

اصحابنا اللي بالوفا .. مالها اجناس
نغفر لها الزله .. وندمـح خطاهـا

ماني على هفوات الأجـواد بـلاس
نذكر محاسنهـا .. وننسـى رداهـا

بقلوبنا تسوى الجواهـر والألمـاس
نرفـع مكانتهـا ونشكـر وفـاهـا

افعالهـم تبقـى مفاخـر ونبـراس
الله لحسنـات الامــور ايهـداهـا

ومن خلقة الدنيا ترى الناس للناس
والكل بالله فـي مساعـي رجاهـا