كسر الخواطر مثل كسر الزجاجه
:/

الحر يزكى .. والدجاجه.. دجاجه =
وماني على بعض المقاريد مجبور

الضرس قلعه لا تألم علاجه=
لا صار ما ينفع معه طب دكتور

وحكي القفى في الناس عيب وسماجه=
وإللي يتتبع عرض الأجواد مثبور

نارد قراح الماء ونترك هماجه =
هذا لنا مبدأ.. ومنهج.. ودستور

واللي يطفي في الغداري إسراجه=
لايحتري قمراء ..ولا يرجي النور!!

تراه يضيع صيدته في عجاجه=
لا يسمع الناصح ولا يأخذ الشور

والكل يبخص في الشدايد خراجه=
لانشبت اللقمة من الغبن في الزور

والحظ لابان الردى في حجاجه=
أصبر مدام الصبر ياخوي مقدور

الله خلق كونٍ وسيعٍ.. فجاجه=
والعبد لو يطرد ورا الرزق معذور

و(راع) الرفيق ولا تعكر مزاجه=
خله سعيدٍ دايم الدوم مسرور

كسر الخواطر مثل كسر الزجاجه=
نفس البشر دم.. وأحاسيس.. وشعور

وإللي يتصدد مالكم فيه حاجه =
يالله عسى إللي يدور الستر.. مستور

واحذر تصير لبعض الألسن (علاجه)=
بعض البشر يشهد.. ويحلف ..على الزور

والتمر يعرف طيبه من خماجه=
ماجور ياللي تدهل الطيب ماجور

الواحد القهار راعه وناجه=
الله يكافينا من الضيم والجور

يقوله إللي قاسي الوقت عاجه=
صابر وهمه داخل الجوف مقبور!

الشاعر راعي مرات ..