يلعب بقلبي لعبة الطفل بالطير



قصيدة من أرشيف الشاعر معجب الصقيري..


يلعب بقلبي لعبة الطفل بالطير
يضحك وطيره ميت(ن) في يدينه

يا لوحة الرسام فيك الشقا غير
يرسم على وجهه ملامح حزينه

كيف البراءه تذبح أحلام للغير
وكيف المنايا في يدينه رهينه

يضحك وكن الأمر عدى على خير
مايدري إن القبر قبضة يمينه

عقب الفضا ماهو على كيفه يطير
واليوم وين الجو عنه ووينه

أصبح سجين الطفل يبكي من الضير
والطفل يضحك ما بلش في سجينه

قضى وطشه يوم وقف على البير
يبغى تشوف الطير لا طار.. عينه

مستغرب(ن) رايح على القاع ومغير
ماغير ريشه منتثر فوق طينه

مايدري إن الطير وقف به السير
كانت نهاية رحلته في يدينه