بسم الله الرحمن الرحيم
لاشفت واحد سبهه ماغير فاك خشته ويتضوحك اعرف انه من الصنف اللي اسمه ( صداق )
لو تقله البارح صادوا ديناصور من العصر الحجري كان مندس بحفرة زيت ورشة سيارات
يصدقك ويروح يسولف السالفة ويحلف انها صدق وموثقة .
واكثرنا كذا . ومن اكتشفوا الناس اننا كذا طاحوا فينا غش ونصب لين صارت تصير عندنا
سوالف ماتصير قبل الفين سنة .
ياكثر الناس اللي انسرقت فلوسهم وتحويشة عمرهم . لانهم صدقوا سوالف مايصدقها احد عايش بربع مخ.
ياكثر ناس حولوا فلوس لنصابين يكلمونهم بالتليفون من خارج السعودية ويقولون انت ماراح تضبط امورك لين
تحول لنا كذا وكذا وراح يغدي شرك .
ياكثر المهبل اللي عطو نصاب تحويشة عمرهم عشان يعطيهم محلول سحري يصبونه على الورق يقلبهن دولارات .
مجتمعنا الصداق خلى العالم تلعب فينا لعب . مو بسبب اننا طماعين ونبي الربح السريع . لا .. عشان اكثرنا مايشعرون
باستقرار نفسي ويبون بسرعة يضمنون مستقبل عيالهم ومستقبلهم وهذا بسبب قل الايمان بالله سبحانه وتعالى .
الواحد لا ابتعد عن الله يقوم يلخبط مايدري وين الصح من الغلط يحسب ان غناه وفقرة معتمد على وش يملك من قروش.
يحسب ان السعادة بكبر الرصيد في البنوك . مايدري ان كل شي بيد الله ولالنسان لاصار عارف هالشي يصير انسان راكد
ومرتاح نفسيا ولا يقرر قرار الا في مكانه . كفاية مكابرة . لو تطقون روسك بالجدار شي مافيه بركة ربى ماوراه خير .
ودمتم