يامرحبا ياهـلا يا أغلا هدايانا
انا على أمواصلك مشتاق وآحبه

يامرحبا اهلا هلا ياعز من جانا
لك منزلٍ وسط قلبي ماحدٍ طبه

تكفين لاتبحثين أقصى خفايانا
مالي عُذر منك يقنع واتعذر به

ارفق عليّ يالغلا واغفر خطايانا
وبطاي لاتحسبونه للهجر سِبّه

ارسلت في وقت متأخر ولا أمدانا
أقرأ رسايلك ياأجمل من خلق ربه

لك العهد والمواعد بإذن مولانا
مادام راسي هبوب الريح تاهبّه

آجيك لو في طريقي تكثُر اعدانا
لو كان دارك ورا خولان ومنبّه

منك الرسايل تخفف هم من عانا
من وقته الي على المقلوب لاعبه

ترى الوفاء ياحبيبي من مزايانا
وانت الوحيد الذي في الكون مُعجب به

ميعادنا الصبح إلى كان الله احيانا
تمسين في خير وانا طيفك احلم به

ياليل تكفى لاتبطي بي وتنسانا
وياصبح قرب ترى الأرواح مشتبّه

احسب حِساب الدقايق في ملاقانا
متى نشوف الذي نغليه ونحبه

أبو/خالد