يطل علينا الشاعر عبد الله الزهراني ( وحش الفلا) المشرف على القسم الأدبي بمنتديات معلمي ومعلمات المملكة والمرابط على الحدود الجنوبية ضمن اللواء الثامن عشر البطل الذي ساهم في الإجهاز على المعتدي الحوثي بقصيدة رائعة وجهها الى أبي خالد والدنا الأمير سلطان بن عبد العزيز بمناسبة عودته إلى أرض الوطن
بعنوان : ابشر يابو خالد مع قلبك اقلوب





وهذه هي القصيدة كاملة بالنص
هات الكفن ماعاد في العيش مرغوب
دام الوطن يُطمع بذرة غباره
اقسم قسم ماني من الموت مرعوب
والمو ت في غيرالمعارك خساره
يوم الشرف لاصار بالدم مكتوب
جندي شهيد ولارضي في دياره
ياسيدي سلطان سلطان محبوب
يأمر وكل الجيش رهن الاشاره
له وحشه والشعب يبكي ومتعوب
غاب القمر والشعب طال انتظاره
يبكي الوطن والدمع حق وموجوب
وشلون مايبكي وسلطان أناره
ابني بمقدم سيدي قد لبس ثوب
واقبل يبشرني بشوق وحراره
يقول والبسمه على وجهه تجوب
هذا أبونا ياأبي جا دياره
غيبتك عنا مشكلة كل متعوب
ودمع الفرح في مقدمك في غزاره
اليا كفخ سلطان فالخصم منكوب
واليااسلمه مالموت عاش بحقاره
واليا وهب سلطان فالخير موهوب
وياسعد حظ الي منح في قراره
له حكمه وحنكه وله راي واسلوب
ورايه التوحيد دايم شعاره
ابشر يابو خالد مع قلبك اقلوب
تعشق لذيد الموت في قدح ناره
حنالها والوقت طيب ومكروب
وعهدا على خصمك يغير مساره
يسيل دمي ولا تبات انت مغضوب
من شرذمه بانت عليها الحقاره
الحق يعلى وأنت بالحق منصوب
ويخسى الذليل الي مسوي شطاره
ياسيدي تكفى ترى القلب متعوب
تطفي لهيب القلب في شن غاره
ابشر بجيش لاصبح الوقت محسوب
يبغت جيوش في الخصم في عقر داره
يقلون حوثي فاقد الرشد معطوب
يرضي بعيد الناس ويخون جاره
دزوه يخسى فاقد العقل منكوب
ضحى بحمقى معجبين بشعاره
لكن وش لاقى سوى لفحة الهوب ؟
والنار لسآ .. ذي مجرد شراره !!
من اللوا الثامن عشر جيت مندوب
جندي مجاهد والتخصص إشارة
وصلاة ربي عد ما هبت هبوب
على نبي نقتدي في مسارة

المصدر : منتديات معلمي ومعلمات المملكة العربية السعودية