عشر مبادئ مساعده في تغيير حياتك
بقلم مروه ناظرين

🌱مافي ندم
الندم عبارة عن تأنيب ضمير على شي عملته و غالبا ماعاد فيه مجال للتراجع... فيه ناس تندم سنين و تفضل في دي الدوامة. مبدأ عدم الندم خلاني دائما متطلعة للمستقبل و أعرف إيش حأعمل بدون تأنيب ضمير و جلد ذات.

🌱 أخطط لسنة وحدة فقط
الحياة بتتغير بسرعة جدا... تخطيطك لعشرة سنين أو خمسة سنين كلنا نعرف إنه ما حيصير شي منه. إذا تبغى خطة حقيقية تطبّق جرب لسنة وحدة وحط لكل شهر منها هدف.

🌱 التعلم من و مع التطبيق
لما أتعلم و أنا أطبق المعلومى تثبت و أقدر أنجزها أفضل لأنه المعلومة فريش و كمان أقدر أكون فنانة فيها أكتر. أما التعلم اللي تتعلم ٥ سنين و بعديييين يمكن تطبق منه ١٠٪ فصعب الاستفادة منه و استدعاءه وقت الحاجة 💔

🌱 جرّب
التجارب دائما خلتني أفوز. المغامرات و التجارب خلتني أفضل و أحسن و أعيش أكتر من عمر و غير الخبرة اللي ساعدتني و بنت شخصيتي بطريقة جيدة أظن 😅 التجارب أدتني مساحة حرة ينمو عقلي فيها و يستكشف الحياة.

🌱 الخروج من دائرة الراحة
عارفين دا الشعور اللي لما بطنك يمغصك لما تعمل الشي اللي يخوف؟ دا الشعور تحتاج تكتر منه لأنه عقلك يكبر و تبدأ تستكشف أماكن جديدة في الحياة مافي ناس كتير وصلوا لها. هدا غير إنك حتكون كسرت حاجز الخوف.

🌱 التطنيش
دا أرهب شي. ناس يتكلموا عليك؟ يستفزوك؟ يسرقوا شغلك؟ طنش تعش تنتعش يطلع لك ريش و يتنفش. كل مرة تعصب ف إنت بتحرق أعصابك على الفاضي. شغّل ثلاجة في قلبك. روق و شوي شوي حتتبنى المبدأ.

🌱 الاكتفاء بالرأي و الحكم الشخصي
دا الوقت أظن جوجل أفضل مكان آخد منه رأي. الأشخاص الموجودين في حياتي غالبهم ما يعرفوا أنا إيش أبغى أو بإيش أمر و بالتالي ما حيستوعبوا إيش أحتاج و بالتالي الرأي حيكون خطأ غالبا.

🌱 التطوير المستمر
مافي يومين يعدوا نفس الشي.. كل يوم لازم أتعلم شي جديد، قراءة فيديو مهارة بغض النظر المهم أنا اليوم أفضل من أمس

🌱 السعادة الداخلية
ما أنتظر أحد يخليني سعيدة. دائما أوفر لنفسي باللي أقدر عليه الأشياء اللي تسعدني. أول ما أقوم أبتسم و أقوم بحماس و أعمل الشي اللي أحبه و أكافئ نفسي. لما تكون سعيد تقدر توزع سعادة على الكوكب.

🌱 التحفيز بالأفعال
التحفيز هو نتيجة فعل. يعني عشان أتحفز و أحس بالإلهام لازم أبدأ أشتغل و أعمل أي شي و شغلة حتجر شغلة و حيبدأ الإلهام و الحماس ينزل. أما لوحدهم... مستحيل و وهم مطلق