البارحـه ليلـي حلــوم وتهاويـل
واصبحت وانا الهم مؤثر عليّه

أضغاث لكن يابشر هدت الحيل
من جورها طاحت عزومي القويه

واسبابها إللي يصنعون التماثيل
أهل الوجيـه الخايبـات الرديـّه

مُزيفيـن الهرج والقال والقيـل
كـم فرقو بين الخـوي وخويـه

طاوعت بي يابنت هرج المهابيل
وانا احسب إنك قبـل هذا وفيـّه

أعطيتك الحالي بوسط الفناجيل
وأنتي عطيتيني سـهوم ألمنـيـه

ماشفت منك إلا العنى والبهاذيل
وراحت حياتي كل ابوها ضحيه

مادام من يمي قطعت المواصيل
واخذتِ لِك من القضية قضيه

روحي عسى يابنت دربك تساهيل
ماعاد تغريني ضحـوك ألشُفيّه

ألمعذره قريحتـي مابـها حيــل
صامت عن أبيات الغزل يابنيّه

ماعاد عندي غير ياليل ياليل
لاتبحثين أقصاي ياالأجوديه

أزريت طول الوقت أجر المواويل
وضاع الأمـل مابين هذي وذيه

لاتسأليني عن كثيـر التفاصيـل
وتقبلـي عُذري بنفـسٍ رضـيـه

بقلم/ابوخالد