ياصاحبـي منك البطى ماهقينا
ألدار بعدك ضاق من ساكنينه

لاتحسبنا عـن هواكـم سلينا
كل المشاعر في غيابك حزينه

ذِكـراك مـازالـت بعـد تحتوينا
وأُسمك على صدر الورق كاتبينه

عامين واكثر ياالغضي ماألتقينا
غبينـةٍ(ن) مابعـدها من غبينـه

أتعبنـي التفكيـر لو ما حكيـنا
وصبرت وجروحي بقلبي دفينه

تدري بعد غيبتك وش صار فينا
صاحِبك والله ماهنى النوم عينه

على صدودك والهجر مارضينا
وصدري على فرقاك بيّح كنينه

غالـي ولو طوّل غيابك علينا
الـودّ باقـي والعــلاقه متينه

وفيك ماأسمع هرجت العاذلينا
وإللـي يهينك جعـل ربي يهينه

لك الغــلا ياصاحبـي ماحيينا
قدرك كبير ومانحن مرخصينه

على الوفأ والطيب حِنا إبتدينا
وراعي الثمينه له نُقدم ثمينـه

بصبر وبتحراك وش في يدينا
مادام حدتك ألظروف اللعيــنه

الطيب والمعروف مزروع فينا
أموت ماأحمل لك بقلبي ضغينه

وأهل المثايل من قديم ألسنينا
قالو من أجل العين تُكرم مدينه

بقلم/ابو خالد