الشوق ماله عمر يفنى وينعاد
له في الضلوع إن عاد و إن غاب رجفة
مع كل فرقى له ورى الجفن ميلاد
وإن ماتت الفرقى لقى الشوق حتفه
جيت أقتل الفرقى من بلاد لبلاد
مل الطريق يشيلني فوق كتفه
وأنا بعد مليت من كثر ماأرتاد
هالشارع اللي كان لك فيه شرفه
‏تظما عيوني شوفك وتشبع سهاد
عيا الزمن يقطع ظماها برشفة
لا وجهك أسقاها ولا ذاقت رقاد
ما غير طيفك طيفك اللي أعرفه
كنه ظبي وعيوني ظلال صياد
يجفل قبل يرتد للجفن طرفه
مشكلته إنه كل ما إشتقت يزداد
حتى ملا جدران وقتي وسقفه
‏وأصبحت أشوفه فأول الغيث لا جاد
وفي أقصى الشفق لا طاحت الشمس خلفه
وفي الأرض لا نامت عقب صوت رعاد
وفي كل شباك صحت منه درفه
أتعبت طيفك لوم واللوم مافاد
ويوم الأمل في شوفتك مات نصفه
نويت أسافر عنك بجروح" جداد
وعمر" من أوراق الزمن حان قطفه
‏نويت لكن جابني الشوق منقاد
وجابك حنينك والزمن سال عطفه
وشفتك تبسم لي خجل مدري عناد
وفي نظرتك شوق من الظلم وصفه
حسيت كني طفل وعيونك أعياد
ياعيدي اللي لك ورى الصدر رجفه
سم اللقاء صدفة وأسميه ميعاد
أنا أنتظرتك وأنت مريت صدفة
راقت لي