قصيدة الشاعر خلف بن هذال (شاعر الوطن ) على لسان (الملك فهد ) رحمه الله


بعد تحرير الكويت في حرب الخليج الشهيره عام - (1411) للهجرة


زبنتي يا بعد روحي زبنتي ......... صحيح ان كنت او ما كنت كنتي
على الحساد قري ما لبستي ......... بعد عيني وقرة عيني انتي
أضمتس من ضلوعي في ضلوعي ..... ومن قلبي على قلبي سكنتي
أنا يا بنت حبي لتس تغذى بحبٍ ....... مثل حب أختي وبنتي
رجعتي لي بعد شالوتس عني ......... بعد شالوتس عني ما ركنتي
صلختي وانصلختي من يديهم ......... ولا هانوتس وانهانوا لا هنتي
أنا أحسب كل غايب ما يعود ......... أحسب انتس عن العالم ضعنتي
وأثر ماللوليف إلا وليفه ........... قسيتي أو على الاحباب لنتي
أعرف انتس عن العثره حصينه ..... لو انتس تنقضين العهد خنتي
قضيت سنين وأيام وليالي ......... حضينتس لي ولا به يوم شنتي
أبا ابكي كل ما شفتس بكيتي ....... وأبا احزن كل ما شفتس حزنتي
أحطتس بالاخوة والمروة لثديتس ...... ما رضع من طفل صنتي
أجيلتس وأنحني لتس وارتكي لتس ...... حضنتس بالايادي واحتضنتي
حميتس مثل وجهي واحتميته ......... ولا ينقص من كسوتس انتي
أنا يوم اتغزل فيتس أحبتس ......... فتنتي كل عشاقتس فتنتي
عشاشيقتس يحبون المنايا .......... على ظنتس حصلس ما ظننتي
تضيق الارض طول وعرض منا ........ من الحيين ضعف اللي دفنتي
إليا احتكت ثم اصتكت نوادي .......... نجيب القول ما سجل بلنتي
لنا بالذروة العليا مقاضب ........... على العز اقترنا واقترنتي
وأنا أصلي يعربي يالاعربيه ......... لسانتس بالفصيحه ما لحنتي
جذبت أصل العروبه يا عريبه ........ هولاكو ما رطنلتس وارتطنتي
عليتس الله وامانه لتس ضمانه ........ ضمنتس الله وردتس وانضمني
اداحم عنتس بالمنكب واعدي ........ وأنا لحصنتس حصانه واحتصنتي
وألا يا كثر مهر تطلبينه ........... ودفعتي كثر مهرتس ما استعنتي
عرفتيني يا بنت أو ما عرفتي ....... أنا اللي قمت لتس يوم امتحنتي
زهمتيني وأنا في الليل نايم ........ وأخذت الوعد من راسي قرنتي
ثنيت الرجل من دونتس وامامتس ...... رهنتي لي من أصلتس وارتهنتي
دفعت الأحمرين دون منه ......... وعلى ميزان ما سقتل وزنتي
خطفتس خطف صامل و متجري ....... كسرت السجن والله ما انسجنتي
لو اني ما تداركتس ذهبتي ......... ذهاب الكحل الاسود وانسحنتي
عسى اللي مر درس تحفظينه ........ مع الايام يبقى ما اختزنتي
عرفتيني وأظن الوصف واضح ....... فطنتي في ولا ما فطنتي
أنا اللي جرها من كل دوله ......... دخلتس صبح وغبارتس مزنتي
وأنا الي وقفتي يا بنت ساعه ........ بهالمرتاع يامن بي وامنتي
فتحت البر والبحر وحميتس ....... من الفتنه سلمتي ما انفتنتي
ولعنت اللي غدر بتس واستباحتس ....... ولعنتي من هضم حقتس لعنتي
رميت عمامتي من فوق راسي .......... وعلى صوتي وترديدي زفنتي
رحاتس تدور وانا اللي عليها .......... طحنت الحب وانتي ما طحنتي
جمعت الناس من داخل وبرا .......... وزنتي بالتحام الصف زنتي
وردت الماء وجبته من ذراعي ........ وشربتي شرب ظامي ما احتقنتي
وأخوي اخوي جابر نسيته .......... عضيدي يوم خفتي واستحنتي
على الكرسي نشيلتس شيل وارسي ........ ومن متني على متنه قطنتي
عرفتيني ولا يجهلتس عرفي ........... ابين مع الحدث من حيث بنتي
أنا اللي رد عن جده جميلتس ....... سلف وخذيه مني يوم ادنتي
وانا ان قلت قول أصدق بقولي .........ماهوب قول الفلاني والفلنتي
انا الوافي فهد و اثبت وجودي ......... صحيح ان كنت أو ما كنت كنتي