منتديات قبائل ال تليد

بعض البشر لا قال كلمه سمعناه
وبعض البشر ما نسمعه لو ينادي
بعض البشر لو غاب لحظه فقدناه
وبعض البشر لو غابت سنين عادي
بعض البشر لا راح عنّا لحقناه
لو بينا وبينه ثمانين وادي
بعض البشر لو ما قعدت انت واياه
ان قلت : وينك ؟ قال : بين الايادي
بعض البشر في ساعة الفود نلقاه
وبعض البشر لا فادنا ولا استفادي
بعض البشر مركى هل الطيب مركاه
وبعض البشر مركاه بين النوادي
بعض البشر يقعد مع اجواد شرواه
وبعض البشر مـ يعرف معنى الاجوادي
بعض البشر مسوي بربعه سواه
مثل سوايا اهل النجف بالرمادي
بعض البشر دايم على الخير مسعاه
وبعض البشر مسعاده خبص العبادي
بعض البشر ما يندرى وين ممشاه
مثل الفحل لا صار وقت الهدادي
بعض البشر لو مات عايش بذكراه
وبعض البشر ذكراه وقت الحدادي
بعض البشر عقب العزا بيوم ننساه
وبعض البشر نلبس عليه السوادي
بعض البشر لو ربنا بس خلاه
الا يغدي سيد ع كل السيادي
بعض البشر مع العمد لو رفعناه
يرجع بعد يومين مع الوتادي
بعض البشر روس العلالي توطاه
وبعض البشر من قاع وادي لوادي
بعض البشر ما تنطق العيبه اشفاه
وبعض البشر العيب امر اعتيادي
بعض البشر نص الدلو صعب يملاه
وبعض البشر محيط هندي و هادي
بعض البشر بين الحضر والبدو تاه
لا اهل الحضر عرفوه ولا اهل البوادي
بعض البشر مــ تعرف وجهه من قفاه
ولا يلبس الا ثوب لونه رمادي
مراه في وجهك واذا اقفيت مذراه
يضحكلك وكرهه على الوجه بادي
بعض البشر في سوق الاجواد تلقاه
ما يسوى قرش ونص حسب اعتقادي
بعض البشر والله والله والله
لو ينشرى بمليون تشريه عادي
الكفو يلقاله خوي كفو يكفاه
واللا الردي يزبن على كل حادي
المرجله والطيب والدين والجاه
جناد للي ما لقا له جنادي
واللي قضب حبل المراجل بيمناه
لو هو على راس النقب ما يدادي
ويلاه يابعض الرجاجيل ويلاه
راحت وعَـقب النار دايم رمادي
اللي رمى كلمه على غير معناه
مثل الطلق من بعد ضغط الزنادي
اللي زرع بذره من الخير يجناه
ولكل بذرة خير موسم حصادي
ويلي اتمنى الشي ليه اتمناه
رزقك وعمرك عند رب العبادي
من عز نفسه وين ما راح يلقاه
ومن باعها باع الركب والعتادي
..........
الشاعر محمد حسين الشنور - ابو قاسم
15 نوفمبر 2014 ·