.
جمّعت لي قرشين باشري عماره
وزوّدتها قرشيـن حـق الدلالـه وجيت العقاري عند مكتب عقاره
شايب شنب غتره وطارح عقالـه
متربّـعٍ ويمـز ذيـك الـزقـاره
ولا مزّها ضرب بها فـي البيالـه
كنه خفيـرٍ مستلـم لـه خفـاره
في فيّة المكتـب ويتبـع ظلالـه
قِمَزْ ورحّب بي بشـوق وحـراره
تقول شايف واحـدٍ مـن عيالـه
قلت اشهد ان العود راسه نعـاره
يالله عساه يطيـب ويزيـن فالـه
ياشيبة الرحمن معـي استشـاره
وانته ومثلـك شوركـم ينعنالـه
انا غشيـمٍ فـي دروب التجـاره
والحظ وقّـف لـي ولا زان فالـه
وباعلمك وشهي علـوم القشـاره
وانت الحكم واحكم وحكمك عداله
فكيت لي مطعم وسممـت حـاره
وتركتـه وفكيـت جنبـه بقالـه
وحطيت فيها عامليـن استعـاره
جارت علي رسوم نقـل الكفالـه
وبديت اديّن واحْسِبْ انها شطاره
وراحت ديونـي كلبوهـا جمالـه
ودخلت في سوق الخشب والنجاره
وضاعت فلوسي في يدين العماله
وفتحت مستوصف وحطيت ادراه
وجبت الدكاتر دارسيـن الزمالـه
جاهم مريضٍ علّته فـي المـراره
شقّوا طرف كبده وشالوا طحالـه
ونسيوا ببطنه رخصةٍ واستمـاره
يامن شرا له علّـةٍ مـن حلالـه
وخذيت لي ونيت دتسـن غمـاره
وركّبت فوقه شبك واربـع قفالـه
وقمت اتريبح في البهم والجفـاره
السوق وقت العيد يالـك ويالـه
لين اعترضها اللي عيونه شراره
واحد عيونٍ جعـل مالـه سلالـه
جاها على الما جعل تفجاه غـاره
وقضا عليها جعل موتـه لحالـه
واليوم ابي لي بيت واخذ اجـاره
لعل باقي العمر يمشـي سهالـه
قال استرح وانس التعب والمراره
وهات الدراهم واكتب الكمبيالـه
ودْلالتي والحُـر يفهـم الاشـاره
قبل الكلام وقبـل مبـدا المقالـه
اربع غرف مبنيـةٍ مـن حجـاره
ومقلّط ومجلس ومطبـخ وصالـه
وحوشٍ يجي للمور فيه استـداره
وبوابـةٍ تدخـل معاهـا الترالـه
ماهوب بيتٍ من بيوت الحضـاره
بيتٍ قديم مـن بيـوت الاصالـه
والموقع مميز وجنـب السفـاره
وان طعت شوري لاتـدوّر بدالـه
قلت اصبر اصلّي صلاة استخـاره
قال اعفني! لو جا زبونٍ وشاله!!
شريته وسقت الذهب والسـواره
شيكين من عندي وشيكٍ حوالـه
ورحت ولقيت البيت كنه مغـاره
مبني من ايام الجهـل والجهالـه
عينت كهفٍ فيه سبعـة جحـاره
ياما جرالي منـه ويامـا جرالـه
والحوش يسكن فيه سبعين فـاره
والباب مايدخل نفر من خلالـه!!
ودوريّه يمينه والاخرى يسـاره!!
ووحدة جنوبيِه ووحده شمالـه!!
معهم تعاليـم الأمـن والـوزاره
بان السكن جنب السفير استحاله
خذيت رشّاشـي وعبّيـت نـاره
ناوي على الشايب وناوي قتالـه
حياة مثلـه فـي الاوادم خسـاره
والله ماخلّيـه ايتهـنّـا بمـالـه
اللي مايامن بـه خويّـه وجـاره
راعي النذاله ين**!! ام النذالـه
شعر /سعيد بن مقبل الأكلبي
