حياة البساطة
 

قصص من الواقع
تقول احدى فاعلات الخير. ..
في يوم رحت اوزع ارزاق
على عوايل محتاجه بحي المرقب وحلة القصمان
والاحياء اللي حولها
انا وعيالي ( عندي ميني باص )
قالت لي واحدة
من الصوماليات.:
في حينا عايلة سعودية محتاجة !!
ياليت تشوفونهم : وورونا سكنهم. يبعد عن بيت الصومالية حول كيلو ونص
او كيلوين اللي بحي ثلم ...
من بكره اخذت معي زميلات
لي بالعمل الخيري ورحنا لهم ، طقينا الباب اكثر من مرة. وبعدها ردت علبنا حرمة. قالت من ؟ حنا مانبي احد يزورنا
ولا حنا زايرين احد ..
ثم ذكرنا لها اسماء عوايلنا
وطلبناعا ان تفتح الباب. .. وفتحت !!!! منزل صغيييير قديم نظيف تفوح منه العراقة وريحة البخور ودهن العود والقهوه تطبخ على نارها والهيل ريحته تفوح
وحرمتين في هذا البيت عليهم لبس الأولين ....
ثوب احمر منقط وسروال خط البلدة.،،وشعورهن حمرا من الحنا مفروقة بالوسط
وشيلة خشم البلبول ...
سولفنا معهم ...
قالت و حدة لاختها يا منيرة جيبي القهوة. ..
وجابتها بدلة ريحتها تشق وتشوق وتمر بطاسة قضار .. المهم قلنا لهم وش انتم وو يش حاجتكم ؟
قالن العفو والعافية ،،
حنا بخير ونعمة ..
انتم اللي وش بلاكم
يا نسكن بفلل بشمال او شرق الرياض يانكون محتاجين. ..!! قلنا مين يصرف عليكم. ؟؟
قالت نگعم الله علينا وافره و خيرنا كثير ..
بس حنا ما عاد لنا رغبه في الحياة الجديدة ابد ،،،
انا واختي ترملتا من بدري ..وعيالناز كبروا ،،،
وكل منهم راح بطريقه
وحبينا نجتمع انا واختي في مكان نحبه ونرتاح فيه
ولا لنا رغبة نجلس عند احد هذا بيت ابونا صلحناه وسكناه
من 20 سنة ..
وكل سنه في رمضان نسكن مكة وما نرجع الا بعد صيام الست عندنا بيت بمكة من اول هدوه بالتوسعة وثمنوه لنا واشترينا شقة قريبة من الحرم .. قلنا لها من بجيب حوايجكم. قالت في واحد سوداني اسمه محجوب فقير وابو عيال نحسن اليه
وندفع له الف بالشهر
وهو يقضي حوايجنا . ويسدد فواتيرنا قلنا وعيالكم يزورونكم قالوا: العيال مايبون يدخلون المناطق ا لشعبية ،، ولا يبون الا الفلل في الاحياء الراقيه
وضحكت. ...
قالت ولكن. يرسلون السواق ياخذنا يوم الجمعة...
يجتمعون على الغدا عند الكبير وهم مايقصرون . يكلمونا كل يوم ومصلحين لنا اجنحة في بيوتهم. وودهم نسكن عندهم.
بس حنا نعيي مره
قالت اشوف عيونكم تتلاقط في بيتنا 😂.. قوموو اوريكم
البيت نظيف بسيط مافيه تلفزيون ولا خدامة ولا كنب ولا سراير. مطبخ جولة جاز ودولاب صغير فيه مواعين كأنهم نجوم تلمع من النظافة حتى فرشهم على الارض . في سجادتين صلاة مفروشة. ومساند مصاحف. .ماشاء الله والمجلس زولية ومساند. والحمام تحت بيت الدرج. وعربي .. سألتها. ام مين ؟؟ ( ماتبي تعلم ) قالت هذي منيرة. وانا جهير ..قلنا لها ليه ماتبون تزورن احد ؟؟ الجار له حق عليكم. ؟؟
قالت صدق ولكن جار من اول مهوب هلحين...
اللي حولنا كلهم غرب ماندري طينتهم ..
قبل لانطلع. قالت امانة لاتعلمون احد بمكانا
قلنا لهم نقدر حنا نزوركم. قالت لا مانبي احد يشغلنا عن طاعة ربنا.. بس جزاكم الله خير على فعل الخير............

راحت جهير
جابت معها الف ريال
وقالت :
هذا المبلغ صدقه وزعيه
لمستحقينه
تبون الصدق
غبطناهم على حياة البساطة😢

رد: حياة البساطة
 

ايام البساطه ولت والحين عصر العولمه والتقنيه والراحه
موو منطق يعتزلون الناس والحضاره ويعيشون نفوسهم بحياه صعبه ولو ان لكل نفس هواها بس برضو موو منطق ولا استوعبت يتعمدون العوده للوراء 50 سنه
قصه غريبه ومثيره سلمتي ع الجلب ندى الجنوب

رد: حياة البساطة
 

ما عليك حقون العصر الحجري ممكن يتصرفون اي تصرف
اهم شي وجدوا راحتهم في حياتهم الرجعية
بدون مايفكرون بمنطق الامور ولا اهتمام الناس بسالفتهم ..

شكرا لمرورك وتعليقك اخي تميم
الله يعطيك العافية ..