|
كيف تخلين ريحه العطر تثبت /وانا مجربتها بنفسي
بسم الله الرحمن الرحيم السلام عليكم يا حبوبات وشحالكم؟؟ اليوم قررت واخيرا اكتب طريقة عطري فالمنتدى المهم بنبدى بالخلطه .. *الملابس المواد الاساسيه: دخون عود (بس ما يكون معطر) مجموعه العطور اللي تستخدمينها كلها حتى الرجالي اذا تبين بس لاتزيدين منه مبخر ه عشان تحطين عليه الثياب كيس بلاستيكي الطريقه: _اغسلي الثياب بس لا تخلينها تنشف عدل يعني خليها مبلولة شوي. _ ولعي الفحم وحطي العوده عليه وبخري الثياب بما فيهم ملابسك الداخليه. _ بعدين حطي الدخون ونفس الشي بس حاولي تخليهم فترة اطول شوي بس قبل لا تخلص العوده او الدخون عشان ما تعلق ريحه الفحم عالثياب.. _ والحين كل العطور اللي عندك عطري الثياب كلها _ وحطي الثياب فالكيس واربطي الكيس عدل وحطيه فكيس ثاني واربطيه عشان ما تتسرب الريحه.. _ واخيرا حطي الثياب فالفريزر لمده فوق ال5 ساعات.. الحييييييين خلصنا من الثياب ويفضل تسوين حركه الثياب قبلها بيوم عشان تنشف قبل المناسبه وتعلق فيها الريحه *الجسم عند الاستحمام.. المواد _شور جيل من ديتول _ ليفه خشنه _ ليفه صابون ناعمه _اي شور جيل من العطور اللي تحبيها انا احب اخلط شور جيل عطر بريتني سبيرز مع جينيفر لوبيز القديم _ ملح خشن _زيت اطفال _سطل ماء بارد _ فنجال ماي ورد _ غسول كير فري الحميم _ شامبو وبلسم (انا احب هيربل لانه ريحته حلوه) الطريقه: _قبل الاستحمام اخلطي الملح اللي بيديك مع الزيت عشان تسوين سكراب للجسم والوجه _وافركي جسمك فيه عدل اما الوجه يفضل فرك خفييف عشان ما تجرحينه _ الحين تمخطري واهجمي عالمسبح اغسلي جسمك من السكراب عادي (وفي الايام العاديه استخدمي السكراب اخر شي يعطي نعومه حلوة للجسم وتصير بشرتك مثل الاطفال) _الحين اغسلي جسمك بصابون ديتول باستخدام الليفه الخشنه عشان يتطهر الجسم _ . _ وبعد ما تخلصين اغسلي شعرك( واذا فيك قشره استخدمي نقطتين من ديتول الاخضر للاستعمال الشخصي روعه للقشره) وبعدها حطي الشامبو والبلسم( البلسم يستخدم بس لاطراف الشعر ابعدي عن الجذور احسن) _وبعدها نجييب الصابون العطري ونحطه على الليفه الناعمه وحطي على جسمج بنعومه .. _وبعد ما نغسل الجسم بالماي نلم شعرنا عدل .. _ نخلط الماي البارد مع فنجال ماي الورد ورشيه على جسمك وويجهك ما عدا الشعر ( وفايده ماي الورد و الماي البارد غير الريحه الحلوة انا يسكر المسام عشان ما تدخل الجراثيم ويشد الجسم بعد الحمام الساخن ونعيما يا حلوة الحين بنرووح لتعطير الجسم بعد الحمام: المواد _ بخور _ مجموعه لوشنات او لوشن واحد كيفك (انا احب اخلط لوشن دهن العود من اجمل مع لوشن سكادا الوردي ولوشن بلاك اكس او لانكوم البيج القديييييم ريحته روعه حتى لو تستخدمينه روحه) _ عطر زيتي اما مسك روز او اي عطر ( انصح وبشده تجربون خلطه عبدالصمد القريشي للجسم ريحتها خباااااااااال ) _مزيل رائحه(انا استخدم مزيل الالوفيرا من ماركس سبنسر ) _بودره ( جربي بودره روز من ماركس سبنسر) _ كريم شارلي (متوفر في اي سوبرماركت ) _ لبس عباه مسكره (مش فووووطه). الطريقه: _تلبسين العباة بعد ما تنشفين جسمك _ تحطين المبخر وتتدخنين ودخني شعرك بعد وهو مبلول. _ عقب ما تخلصين شيلي العباة وتعبلي بعمرج. _ حطي كريم شارلي تحت الابط وريحته حلوه ويساعد في منع التعرق شوي.) _ ادهني كل جسمك باللوشن ما عدا الوجه. _ حطي مزيل الرائحه اذا حبيتي _ رشي جسمك كل بالبودر خاصه تحت الابط وتحت الصدر. _ واخيرا تجيبين العطر الدهني وتحطينه على اماكن النبض وبين الثنيات ( تحت الاذن, على الانف , الرقبه, اعلى الصدر يعني القلب, , ثنيات اليد) وننتقل للشعر: _ دخون _مخمريه _عطر دهني روز او خلطه عبدالصمد القريشي _ دهن عود _ عطر فرنسي رش (اي عطر تحبينه على شعرك انا احط بربريز الوردي حلوه ريحته مع دهن العود او موسكيني القديم الاحمر احس ريحته ريحه نظافه) الطريقه: _ طبعا احنا غسلنا الشعر وبخرناه مع الجسم عدل وهو مبلول _ ننشفه بس بدون شسوار يعني تنشيف فووطه خفيف خليه شوي مبلول عادي _ نحط المخمريه على شعرنا بعد ما نمسحها بايدنا ونفرك ايدنا عدل مع مساج خفيف للشعر عشان يشرب الشعر الريحه. _ نحط العطر الزيتي تحت الجذور يعني اعلى الرقبه مع دهن العود وعلى الاذن واللي بيتم فيدك امسحي فيه الشعر _ ورشي العطر اللي تبينه من بعيد عليك وعلى شعرك اللي تخاف شعرها يبيض لا تحط غير المخمريه (عن نفسي الحمد لله من كم سنه وانا احط الخلطه ما طلعتلي ولا شعره بيضه) الفم: المواد _ شويه قرفه _هيل _سنوت (يانسون) _عوده صغيررررررررررررة خذي شويه منها بس شوي _ قطرة دهن عود _ماء ورد الطريقه: _ نطحن القرفه والهيل والسنوت والعود ويا بعض ونخلي البودره فعلبه نستخدمها كل ما نبي _ نحط وياهم نقطه دهن عود _ بعد غسيل الاسنان عدل واللسان اللي يطنش الكثير غسله باستخدام فرشاه خاصه له ( وعلى فكره السبب الاكثر لريحه الفم اما البطن او اللوز او اللسان لانه تتجمع عليه البكتيريا والفطريات) _ خلي بحمامك جيك ماي ورد دايما للوجه والفم _لما تخلصين غسيل اسنانك عدل بعد استخدام الغرغره بعد _ تمضمي مرتين بماي الورد اول مره تفيه برع وثاني مره شربيه عادي _ استخدمي الخلطه بدعك الاسنان واللسان فيها ممكن بلعها عادي ما تضر (ابلعها من سنين والحمد لله ما صا رلي شي) _ واللي ما تقدر تبلعها تخليها فتره في فمها وبعد ما تخلص منها لا تغسل فمها بالماي العادي تغسله بماي الورد. اما الوجه فما يحتاي غير انك تبلين قطنه بماي ورد بارد وتحطينه على ويجهك قبل الميكب بس لا تمسحينه خليه يجف روحه (فوايده مع استمراريه الاستخدام يعني نضارة ويرطب الوجه ) وانا مجربتها تخلي ريحتك واوووووووووووو |
| الساعة الآن 01:02 AM
|
Powered by vBulletin® Version 3.8.11
Copyright ©2000 - 2024, vBulletin Solutions Inc.
new notificatio by 9adq_ala7sas
استضافه ودعم وتطوير وحمايه من استضافة تعاون