الشعب السعودي بكا فقد سلطان=خسارة الشعب السعودي كبيره
أبكيك ياسلطان والدمع شنان=أبكي الوزير اللي يقيل العثيره
أبكيك ياسلطان ياركن الأركان=كسيرة يا كبرها من كسيرة
أبكي حبيب الشعب شيبه وشبان=أرثيه كيف أرثيه بالقلب حيره
أرثي الأب الوالد أبو الخيرسلطان=رحلت ياراعي الكرم والبصيره
رحلت والشعب السعودي بالأحزان=في ذمة الله مايخيب جويره
في ذمة المولى وهو عالي الشان=في ذمة اللي عالم بالسريره
بكا الجنوب من الوديعة لجازان=وصوت الشمال بحزن يسمع زفيره
وشرق الوطن مع مغربه بالحزن بان=وياهولت الوسطى مقر المسيره
لقد حزنا حزننا أشكال وألوان=والجيش أول من تباكاء وزيره
ودموعنا تروي ثرا كل ميدان=نسكب على الغالي دموعا غزيره
سلطان مثل الغيث في قحط لزمان=هداج ماتقطع مصادر غديره
يا أمير كيف أرثيك في نظم قيفان=لكن أمر الله لنا فيه خيره
صبرا جميلا يا أبا متعب الآن=اجرك عظيم وكلنا له مصيره
وبصمات أبو خالد على الارض برهان=يشهد بها التاريخ في كل ديره
وشال الوطن من كل منصب وميدان=لأنه رجل وزنه بحجم الجزيره
نرثيه من فقده مصيبه وخسران=ونذكر سجاياه الحميده كثيره
المملكة تبكي حضرها وبدوان=الجو مظلم وأرضها مستخيره
ترك لنا الدنيا فناها والأحزان=ورحل إلى رب السماوات جيره
عساه في صحبة ولد سيد عدنان=في جنة الفردوس ياخير سيره
في رحمة المولى رؤوفا ورحمن=ياحسن حظ اللي وربه مجيره
يارب يارحمن تلطف بسلطان=سلطان ودع صحبته والعشيره
وختامها صلوا عدد فرض الأركان =على المشفع في نهار الحشيره