https://g.top4top.io/p_2550kdms60.gif

لا صرت مؤمن بالعسر والتياسير
‏وعينك بعين الله ما يكسرونك

‏ولو سكروا بيبانهم بالمسامير
‏بيبان ربي ما تسكر لعونك

‏وقِّف ولا تهزك رياح المقادير
‏واضحك كثر ما حاولوا يجرحونك

‏خلّك جبل ثابت بوجه الأعاصير
‏وللغانمة اسبق قبل يسبقونك

الناس لو بيدينها الرزق والخير
تشوف من النفس حتى يقطعونك

ولو ضحكتك بيدنهم؛ يمكن كثير
حتى ضحكتك يب يحسدونك

ماينوكل لحم الاوادم ولا يصير
ومن إتهيأ طيحتك ياكلونك

قطعة خشب لاتصير بيد المناشير
والله بأقرب فرصة يحرقونك

ولا تحسب نفوس المريضة مذاخير
الذخر والله من يطيحون دونك

إشتر فراق أهل الردا بالدنانير
لوتنقص أموالك وتكثر ديونك

ولا تتعب أقدامك بكثر المشاوير
وانت بقفاك تعرف مايشتهونك

ماجوك يوم ان المصايب طوابير
والحين لاضاقت عليهم يجونك

لا تصير ويا الاوادم مثل الاصنصير
تشيلهم واليا صعدوا مايبونك

قرب من الطيبين من دون تفكير
وابعد من عفون العرب لا يعدونك

ربع المصالح لو تكثر مسايير
لا خلصت حاجاتهم يتركونك

ربع الوفا لو هم قليلين بس غير
لو تنشرى بأعمارهم يشترونك

خطاك عند اللي يحبونك صغير
قبل اتعذر عندهم يعذرونك

ومن يبغضك لو تفرش القاع نوير
ادناة غلطه بحقهم يفضحونك