|
مسار جنائي
💔
كنت أدرس علم نفس ولما جيت أطبق إخترت مسار جنائي يعني أطبق من السجن كل يوم أروح اقابل سجينة وأتكلم معها قابلت الكثير بجرايم سرقه وقتل ونصب بس مجرد حوارات علشان أكتبة بالتقرير وأقدمة للمشرفة لما جاء دور وحدة لها قصها محزنة جدآ وهي من عنبر الأداب ( خلوة غير شرعية وتهمة قتل ولكن لم تتوفر الأدلة الكافية فما ثبتت التهمة عليها أول ما جلست معي عرفتها بنفسي وقلت لها أنا فلانة الفلاني من جامعة الملك سعود أخصائية نفسية وودي أتكلم معك شوي إذا ما عندك مانع رفعت عيونها لي وهي منكسرة وقالت عادي أقولك اللي صار لي 💔 قلت لها تفضلي قولي مانطقت ولا بحرف جلست تصيح وتصيح وتصييييح تقطع قلبي معها 💔💔😭😭😭 وإستمرت تشاهق وتصيييييح عطيتها موية ولا قدرت تشرب وجت السجانة ورجعتها العنبر 😭💔 ولا قالت قصتها رجعت بعد كم يوم وطلبت أتكلم معها ورفضوا السجن وبعد إصرار وتدخل من مشرفتي وافقت المسؤولة وجابوها لي البنت كان عمرها تقريبآ 21سنة يوم أقابلها لما جلست قبالي ناظرتني وقالت أنت تدرسين بعليشة قلت إيه ( يوم كانت جامعة سعود بعليشة) قالت أنا كنت أدرس بعليشة ترجمة قلت ماشاء الله قالت إيه لو ماصار اللي صار كان باقي لي سنة وأتخرج 😔 قضيتي صار لها ثلاث سنين واللي حقق معي محقق من هيئة التحقيق والإدعاء العام وقضيتي الأساسية خلوة غير شرعية والمشرفة على السجن تقول لما جتنا عرضوا عليها الصور مكان الخلوة وكان من بينهم شماغ عليه طبعه روج وكانت أكثر صورة إنهارت يوم شافتها وكان لازم يعرضون البنت على طبيبة نساء لتأكد من عذريتها وبدت تحكي قصتها لي وقالت حبيت شخص وتعلقت فيه وإستمرت علاقتي فيه سنتين وخلال هالسنتين يطلب يشوفني وأنا أرفض و هو ميييت بيشوفني وأصلا كان صعب أهلي متشددين مررررره أمي ما تسمح أطلع أبد لأي مكان (أما حبيبي تعرفت عليه من النت من منتدى ) وكل ما أصر يشوفني أضعف ولا فيه مكان يشوفني غير بيت أهلي بس وشلون ؟؟ لي أربعة إخوان وأمي وأبوي كيف أقدر أصرفهم بنفس الوقت !!؟صعب مررره تقول لين جاء مره من المراات وأبوي وثلاث من إخواني بيكشتون لمخييم بعيييد وأمي وأخوي الرابع معزومين ببيت جدتي . وحسيت الأمووور تماااام وتمشي زي ما أبي . على طول كلمة حبيبي العصر وعلمته وأنا أرتجف من الخوف وقلته نتقابل في بيتنا بعد الساعه تسعه قال خلاص إذا الأمور تمام بلغيني بصير حول بيتكم 😔 وإتفقت إنه يجي بعد تسع ويطلع قبل عشر , 🌙 |
رد: مسار جنائي
#التكملة.....
وإتفقت إنه يجي بعد تسع ويطلع قبل عشر .. جت أمي تقنعني أروح للعزيمه معها وأنا سويت نفسي تعبانه ولا أقدر وطايحة بالفراش وأمي من الخوف عليّ قالت بجلس معك مالي قلب أروح وأنت تعبانة ولحالك وحاولت أقنعها ووقلت لأخوي ودها أنا بخير وبنام أصلا وفيه الشغالة وإقتنعت وإخوي قال بتعشي وأجي للبيت ما أتأخر وطلعوا أمي وأخوي تقريبآ الساعة ثمان قمت بسرعة وقلت للشغالة روحي نامي مافيه شعل وأنا بنام ورقت لغرفتها بالدور الثالث وأنا تزينت ورتبت غرفتي ولبست وتعطرت ونزلت وجهزت سلة فواكة وعصير ورقيتهم لغرفتي ودقيت على حبيبي قال دقايق وإفتحي الباب وقلبي يرجف خوف ورهبة وجاء وفتحت الباب كان طوييل ورزة وشياااكة وضميته ودخلنا البيت ورقييته لغرفتي ويوم دخلنا الغرفة جلس على الكرسي وناظرت إلا غترته فيه طبعت روج مني ضحك وقال عاادي خليها علشان تكون ذكرى منك 😍 مادريت إنها دليل يدمر حياتي 💔😔😭 جلست بعيد عنه وأنا أفكر وش اللي سوييته كيف تجرأت كذا وقلبي يرجف خوووووف وأشوفه مد يده وأخذ حبة فراولة ورماااها بفمه وهو يبتسم لي 😊 وأنا ميييته خجل وأحس دموعي بتنزل من الخوف لو جاء أخوي لو الشغالة نزلت 😞 وفجأة بديت أشوف الإبتسامة تختفي من وجهه والرجال قام وجهه يتقلب وصار يخبط بالأشياء قدامه ووجه قلب أحمر أزرق ثم أسود حااول يكح ماقدر قمت له بسرعة فلان وش فيك وش صار يوم حاول يتنفس ماقدر تكسرت الأشياء حوله من كثر ما يخبطها ويحاول ينقذ نفسه ماقدر حاولت أسااعده مافيه فاايدة ضربت ظهره بقوة أبد ماتغيير شي حبة الفراولة ناشبة بحلقة صار ينازع المووت وطاح على الأرض ويرتجف وتكسرت الطاوله من رفس رجووله وإنكبت الفاكهة وفجأة توقف كل شي وصار جثة هامدة بلا حركة ولا نفس 😳😱😨😰😭 تقول قعدت أخبط بنفسي وأرقى ياربي وش أسوي وذا طايح بغرفتي وش هالورطه اللي أنا حطيت نفسي فيها وأجلس أصيح وأصرخ 😩😫😩😫 ونزلت الشغالة تقول وش فيه ؟؟ قلت لها تعالي فيه حرامي بغرفتي 😧 وتقعد اصاارخ وأسحبها معي للغرفة قلت لها أنا ضربته بالكأس على راسه وطاح تعالي نسحبه تحت تقول علشان أدق على أهلي بقولهم حرامي بالصالة لكن صار اللي وحنا نسحبه نبي ننزله مع الدرج إلا أخوي اللي ودى أمي بوجهي ومتنح ويناظر 😮 |
رد: مسار جنائي
#التكملة.....
اللي ودى أمي بوجهي ومتنح ويناظر 😮 وأترك يد الرجال وأجلس أصارخ حرامي دخل علينا البيت والشغاله تصاايح وأخوي منهبل ولا قال ولا كلمة ويابس بمكانه ويتنفس بقووووة ويناظر الغرفة حوسة والطاوله مكسورة والفواكة مكبوبة . قال ليش كذا غرفتك ؟؟ إبن الكلب سواااالك شي ؟؟ ودموعه تصب وصوته مبحووح ويرجف من القهر ويمسكني قال الحرامي سوالك شي ؟ وأنا ميتة خوف ما أدري وش أقول ؟ وإلتفت للجثة قال خلوها وجاء عنده حركة ماتحرك ورفع راسة وسمع نفسه قاال هذاا ميييت ؟؟ هنا أنا إنهررررت 😭 ياربي إنه كابوس ياربي إنه حلللللم وإخوي على طول دق على الشرطة وبلغهم ودق على أبوي وإخواني وأنا خلاااص ماعاد فيني دم ولا أقدر أتنفس وكلها نصف سااعة إلا البيت إمتلى شرطة وجاء الإسعااف وناس ترقى وناس تنزل معهم معداتهم وأنا شوي بمووت خووف ولمحت أمي دخلت البيت ورحت حضنتها وأنا أرتجف وأردد يممنمه يممممه وأنتفض وهي تسمي عليّ وتقرأ أية الكرسي وأنا أحس بالأمان وهي حاضنتني وأخوي يناظر فيني نظرة توجع ماعرفت معنااها وأنا أتصدد عنه 😩😩😩 وشالوا الجثة وطلعوا وجاء الشرطي يستجوبني وأنا ماقدرت أوقف صيياح وطلب أخوي تأجيل الإستجواب قال زين نستجوب الشغالة 🙆🏻 هنا الشغالة قالت بعد ماما ماراحت عي قالت روحي نامي ويوم سمعت الصراخ نزلت لقيت الحرامي ميت بغرفتها وضل أبوي وإخواني من المخيم منهبلين وتطمنوا إني بخير والشرطه خلصوا وقالوا بكره نكمل التحقيق مع البنت إذا هدت والصبح جاني إخوي الكبير ق إخوي الكبير قال كلمت محامي والمحامي يبي يشوف الأوراق ولا له داعي تروحين الشرطة هو حرامي وتهجم على البيت وأخذ جزاته ذيك الليله ما أحد منا نااام أو غمضت عيينه وأبوي وإخواني نظراااتهم تكسر الظهر وتوجع القلب كل شي ضدي كشختي وغرفتي وحرامي كاشخ وهدية مغلفة كان جابها معه بس ماااودهم يصدقوون 🙆🏻😔 المهم أهل الولد لهم سمعة ومركز كبيير بالبلد وإنجنوا يوم عرفوا إنه ولدهم مااات .. وحطوا محامي .. وطلبوني الشرطة شخصيااا #يتبع |
رد: مسار جنائي
وطلبوني الشرطة شخصيااا .. ورحت مع أمي وأبوي وإخواني وأبوي أشوفه كبر مية سنة من البارح بس مايقوى يمشي وأمي ماوقفت دمعتها أبد وإخواني مشتتين التفكير
غرفة التحقييق تخووف وفيها رجال لابس ثوب وشماغ صوته يخوف ونظرات عيونه تخوف أكثر وطريقة إستجوابة رعب ولا إسمحوا لأحد يدخل معي من أهلي وقال أنت فلانه ؟ بدون مايرفع عيونه قلت إيه قال إجلسي .. وجلست قال شوفي المحامي حقك قرأ أوراقك تدرين وش قال لأهلك ؟؟ قلت : لا قال : القضية راااكبتك وأنت جانية 💔 ساعديني علشان أطلعك من قضية القتل لأن الخلوه منتهين منها 😫 قعدت أصييح وأقول والله ماسويت شي هذا حرامي 😨 نفخ عليّ وصرخ قاال بلااااا كذب ويسحب صوره يوريني قال هيوريني قال : هذي كاسين بغرفتك وعليها بصماتك وبصماته وباب الشارع مافيه خلع وعليه بصماتكم الأثنين وجواله فيه مكاااالماات لك ومنك كثيرة أنت تعرفية وجاك عن سابق معرفة كل الأدلة ضدك بس قولي القصة بالكااامل 👉✋🏻 هنا أنا انهرت وإغمى عليّ ونقلوني للمستشفى كنت تحت الحراسة المشددة وبعد يومين ما شفت خلالها أحد لا من أهلي ولا الشرطة بس دكتور وممرضه شوي ويطلعون بعدها جاء المحقق وسألني هااه وش صاار وإعترفت بكل شي 😫😭💔 قلت إني حبيته بس ماقتلته أخذوا بصماتي وإعترافاتي ونقلوني للسجن المركزي وأهلي أخر مرة شفتهم قبل أدخل المستشفى وقبل يغمى عليّ 💔💔💔 وبعدها جلست تصيح تصيييح وجت السجانه أخذتها للسجن وجلست إسبوع عنها ماقدرت أروح لها وبعد إسبوع رحت للسجن وسألت مشرفتها قالت من يوم دخلت لها خمس سنين ما عمر أحد سأل عنها من أهلها وعادة قضية الأخلاق الأهل يتبرون من بنتهم يابنااات أنا ماقلت القصة علشان أحد يبحث ويعرف منهي البنت قلتها علشان لاتتهاونون بسمعتكم وشرفكم وترخصون أهلكم البنت مسؤولة عن نفسها وعن سمعة عايلتها والسجن فيه. قضايا تشييب الرأس الله يحفظنا وذرياتنا والمسلمين #انتهى 🌙 |
رد: مسار جنائي
القصه اليمه
كل خيانه او اي أمور خاطئه لابد أن تفضح بأي شكل من الأشكال. ومهما كان يوجد رقابه اسريه في وسط غياب رقابة الله في أنفسهم قد تقع المصيبه. لأننا راينا كيف غافلت البنت أهلها في سبيل الالتقاء بالفارس المغوار..! الله المستعان كان الله في عون أهلها والله يهدي بناتنا لأحسن الأخلاق والحفاظ ع قيمهن. شكرآ صمت دمتِ .. |
| الساعة الآن 12:31 AM
|
Powered by vBulletin® Version 3.8.11
Copyright ©2000 - 2024, vBulletin Solutions Inc.
new notificatio by 9adq_ala7sas
استضافه ودعم وتطوير وحمايه من استضافة تعاون