منتديات قبائل ال تليد - تنحت بي الصدفه وكف القدر مجهول

تنحت بي الصدفه وكف القدر مجهول
وجيت المكان اللي زرع فيني الحسره

بعد غيبةً تاريخها اليوم سابع حول
فراقً طويل يعيننا الله على صبره

تأثرت والذكرى عزى حظي المشلول
على منعطف حبٍ تنحت به الهجره

غرامٍ توارى واختفى مابقى له زول
توارى بعد ما اعطاه وجه الدهر ظهره

وانا داخل اطلاله تمشيت عرض وطول
اكيل الندم واناجي الحب في قبره

وقفت اتفكر بالفوارق وانا مشغول
فوراق ظروف اليوم والامس والبكره

مناظر تذكرني زمان الهوى المقتول
بتأثيرها زف الشجن دمعة العبره

دموعٍ تفيض ارواحها وش لقت ياحول
تعانق حروف اسمٍ نقشته على الصخره

واخيرا رجعت اشيل حمل الندم مذبول
اغض النظر بالحال والنفس منكسره

الا واسفا بالحال عزاه ويش اقول
رضيت الصبر مجبور لو الصبر جمره